- جري له إيه؟
- صلي الفجر وطلع علي فرن العيش علشان يحجز مكان في الطابور، وقبل أدان الضهر جه عليه الدور وحصل له بجنيه عيش، حطهم في الشنطة ويادوب مشي خطوتين وهو راجع لبيته بالعيش للعيال علشان يفطروا، طلع له عيل ابن «...» وخطف من إيده شنطة العيش وجري، الراجل اتجنن وقعد يجري وراه بس مالحقوش، راح واخد بعضه ورايح علي المركز يحرر محضر بخطف شنطة العيش وراسه وألف سيف إلا يطلع معاه أمين شرطة ولا عسكري يجيب له عيش بدال اللي اتخطف.
- لا يا راجل مش هو عمك أبوإسماعين اللي ساكن قبلي البحر الصغير.
- لا وشفت أبوك عطوة أتسرق منه العيش برضه خد العيش وفرده علي جرنال يتهوي، واتلفت وراه بص مالقاش العيش، قعد يلطم، ولما قام يقف في الطابور تاني لقاه أطول من الأول قام من الغيظ طب ساكت وطلع السر الإلهي.
- آه أنا سمعت في مكرفون الجامع إنه مات وجنازته حتطلع بعد صلاة العصر، هو أصله لما وقف تاني في الطابور ييجي ثلاث ساعات ولما جه عليه الدور كان العيش خلص قام طب ساكت يا ولداه.
- المصيبة مش كده وبس ده الكلام داير عن الست اللي اتقتلت في طابور العيش في اسكندرية، وإن فيه معركة قامت بالسنج والمطاوي في طابور في شبين القناطر.
- كمان في واحدة اتخزقت عينها وهي بتحاول تاخد دور في الطابور والحكايات دي شغالة في مصر كلها، قوم نشوف مين اللي مات خلينا نروح نمشي في الجنازة.
الوقائع - مع التصرف في الأسماء حوار أطرافه أبناء قرية من قري مصر - خزانة غلال روما سابقا.
كانت خزانة غلال أيام أن كانت مستعمرة، وفي ظل الحكم الوطني الديمقراطي أصبح كيس العيش مطمعا، وبالضرورة سوف يذكر التاريخ أنه وفي ظل نظام الحكم في مصر وفي فترة رئاسة دكتور أحمد نظيف للحكومة وبقية دكاترة حكومته كان الناس يتقاتلون علي رغيف العيش، مما دفع رئيس الدولة إلي الاستعانة بالشرطة لمراقبة انتاج العيش وتوزيعه***
reda***
الرئيسية 
أحدث الصور 
الخميس مايو 08, 2008 4:06 pm